Azərbaycan klublarına lisenziyalar təqdim olunub

Azərbaycan klublarına UEFA-nın kişilər və qadınlar arasında klub yarışlarında, Premyer Liqada, 1-ci Liqada və AFFA Yüksək Qızlar Liqasında iştirak etmək üçün lisenziyalar təqdim olunub.

Pressing.az AFFA-nın mətbuat xidmətinə istinadən xəbər verir ki, 2025/2026-ci illərdə sözügedən yarışlarda iştirak etmək hüququ qazanan klubların nümayəndələri ilə görüş keçirilib.

AFFA-nın inzibati binasında təşkil olunan təltifetmə mərasimində mövsümün yekunları, statistik göstəricilər, Klubların Lisenziyalaşdırılması Sistemi üzrə elektron platforma və növbəti mövsüm üçün lisenziyalaşdırma qaydalarında gözlənilən dəyişikliklər barədə məlumat verilib.

Tədbirin sonunda növbəti mövsümdə çıxış etmək üçün lisenziya əldə etmiş klublara AFFA-nın vitse-prezidenti Könül Mehdiyeva tərəfindən müvafiq lisenziyalar və geridə qalan mövsümdə Lisenziya Menecerləri üçün təşkil olunmuş imtahandan müvəffəqiyyətlə keçmiş klub əməkdaşlarına sertifikatlar təqdim edilib.