“İdman həftəsi” çərçivəsində Məşqçilərin I Forumu keçirilib

Bədən Tərbiyəsi və İdman Günü münasibətilə təşkil edilən “İdman həftəsi” çərçivəsində tədbirlər start götürüb.

Pressing.az xəbər verir ki, ilk tədbir Məşqçilərin I Forumu keçirilməsi olub.

Forumda Menecment və biznes, kineziologiya üzrə fəlsəfə doktoru, Maribor və Lyublyana universitetlərinin professoru Edvard Kolar (Sloveniya) “İdmançıların hazırlıq və performansının ekspert modelləşdirilməsi – “Məğlubedilməz Azərbaycan” layihəsinin əsası kimi” mövzusunda təqdimatla çıxış edib.

İlk dəfə olaraq tədbirdə xarici mütəxəssislərin çıxışları zamanı tərcümə süni intellekt vasitəsilə aparılıb.

“Baş məşqçinin rolu: lider, pedaqoq, yoxsa menecer?” mövzusu üzrə 1-ci panel müzakirələrdə “Qarabağ” FK-nın baş məşqçisi Qurban Qurbanov, qadın voleybolçulardan ibarət Azərbaycan milli komandasının baş məşqçisi Faiq Qarayev, 2-ci panel müzakirələrdə isə Olimpiya çempionu Namiq Abdullayev və Azərbaycan badminton millisinin baş məşqçisi Morteza Validarvi iştirak ediblər.

3-cü panel müzakirələrdə Azərbaycan Milli Antidopinq Agentliyinin icraçı direktoru Təhminə Tağı-zadə, Tibb və fəlsəfə doktoru, Fiziki məşq fizilogiyası üzrə professor, Yaxın Şərq Universitetinin İdman Elmləri Mərkəzinin direktoru Əli Heydər Dəmirəl (Türkiyə) iştirak ediblər.

Forumda Sloveniya İqtisadiyyat, Turizm və İdman Nazirliyinin İdman Ombudsmanı, atletika üzrə məşqçi Rozl Prezel “Şəxsiyyətin qorunması (Safeguarding)” mövzusuna toxunub.

Forumun davamında inklüzivlik və sosial təsir üzrə təşəbbüskar, voleybol üzrə ikiqat Olimpiya Oyunlarının gümüş medalçısı Yelizaveta Brax-Tisçenko (İsveçrə) “İdmаnda qadınlar, məşqçilik və liderlik”, tətbiqi kineziologiya üzrə fəlsəfə doktoru, böyüklər üçün Psixi Sağlamlıq Mərkəzində Klinik psixologiya üzrə mütəxəssis Maya Smrdu “Şəxsiyyətin qorunması” mövzusu barədə fikirlərini bölüşüblər.

Sonda mütəxəssislər Namiq Bədirxanov, Rozl Prezel və Maya Smrdu təqdimatla çıxış ediblər.