Yeni mövsüm başlamazdan öncə "Turan Tovuz"da şok ayrılıq yaşanıb.

İllərini Qərb təmsilçisinə verən, bu klub üçün böyük işlər görmüş Nadir Nəbiyevlə gözlənilmədən yollar ayrılıb. Uzun illərdir "Turan Tovuz"a rəhbərlik edən və son dönəmlərdə klubda uşaq futbolundan məsul olan Nəbiyev vəzifəsindən göndərilib.

Ayrılıqdan sonra mətbuata qısa açıqlama verən Nadir Nəbiyev çox danışmağı lüzum bilməyib. Görünür ki, o, doğma klubundan, daha doğrusu, TT rəhbərliyindən incik düşüb.

Azarkeşlər də klubun əfsanəsini unutmurlar. Belə ki, ötən gün Premyer Liqanın 1-ci turu çərçivəsində keçirilən "Neftçi" - "Turan Tovuz" matçında (0:0) fanatlar "Turan"ın əfsanəsi Nadir Nəbiyev" yazılı pankart açıblar. Onlar bununla Tovuz klubunun rəhbəri Ehtiram Quliyevə mesaj veriblər.

Anlaşılan odur ki, cari mövsüm "Turan Tovuz" cəbhəsində qalmaqal sarıdan sükut olmayacaq.

Elsevər Muradzadə