Bakıya gələn qazaxıstanlı jurnalist: "Pokatilovla fəxr edirik. “Sabah” isə möhtəşəmdir"

"Sabah"ın ötən gün UEFA Çempionlar Liqasının pley-off mərhələsinin cavab oyunları çərçivəsində İsrailin "Hapoel Beer-Şeva" komandasına qarşı oyununu Tofiq Bəhramov adına Respublika stadionunda izləyənlər içərisində başqa ölkələrdən gələn jurnalistlər də vardı.

Onların arasında 6 qazaxıstanlı media nümayəndəsi də görüşü "hadisə yerindən" izləyirdi. Qarşılaşmadan sonra Qazaxıstanın "Na Football" nəşrinin əməkdaşı Adilzxan Aymakovla qısa söhbətimiz oldu. Həmkarımıza ilk sualım isə "Sabah"ın qazaxıstanlı qapıçısı Stas Pokatilov haqda oldu:

– Bakıya Pokatilova görə gəlmisiz?

– Tam olaraq yox. Bilirsiz, bura yaxın ölkədir, Qazaxıstanla Azərbaycan arasında cəmi bir saatlıq uçuş məsafəsi var. Həm də bu, Çempionlar Liqasıdır, belə oyunları görmək böyük şansdır. Bilirdik ki, Stas ötən mövsüm ölkənizdə həm Premyer Liqa, həm də Azərbaycan kubokunda qalib oldu. Biz onu sevirik, çünki yerli klubumuz "Aktobe"də oynayıb. Ona klubun əfsanəsi də deyə bilərəm. Hələ də onu sevirik, onun üçün darıxırıq. O, həm "Sabah"ın, həm də Qazaxıstan millisinin fəxridir.

– Bəs onun bugünkü performansı haqda nə düşünürsüz?

– Zənnimcə, Stas yaxşı oynadı. Bir səhv etdi, ama sonda hər şey yaxşı qurtardı. Məncə, o, çox güclü qapıçıdır. Həm də bizim ölkənin ən yaxşı qapıçılarından biridir və bu, hələ də belədir. Ümid edirəm ki, Stas Çempionlar Liqasında oynayandan sonra Qazaxıstan millisində 1 nömrəli qapıçı olacaq.

– "Sabah"ın uğuru və Bakıdakı atmosfer haqda nə deyə bilərsiz?

– "Sabah" sadəcə möhtəşəmdir. Azərbaycan üçün tarix yazdılar. Qazaxıstanlı olaraq biz də qürurlandıq. Stadiondakı atmosfer də əla idi. Əsl Çempionlar Liqası matçı idi.

Daşqın Əziz