"Neftçi"yə qarşı oynamaq hər zaman çətin olub. Son derbidə də bunun şahidi olduq. Komanda yoldaşlarım əllərindən gələnin maksimumunu etdilər. Son iki oyuna baxanda, komandamızda yorğunluq da hiss olunurdu".

Bu sözləri Pressing.az-a açıqlamasında "Qarabağ"ın kapitanı Maksim Medvedev deyib. Təcrübəli futbolçu Misli Premyer Liqasının 16-cı turu çərçivəsində ötən gün baş tutan "Neftçi" - "Qarabağ" oyunu (0:4) haqda danışıb.

Medvedev, Ağdam təmsilçisinin matçda dominant futbol sərgilədiyini bildirib:

"Görüşdən əvvəl də istəyirdik ki, dominant futbol sərgiləyək. Fikrimcə, bu da alındı, 4 qol vurduq. Bu, bizim üçün sevindirici haldır. Futbolçular, məşqçilər korpusu, azarkeşlərimiz - bir sözlə, hər kəs xoşbəxtdir".

Uzun müddətdir zədədən əziyyət çəkən və yenidən yaşıl meydanlara qayıdan 33 yaşlı müdafiəçi bu haqda da fikirlərini bölüşüb:

"Həm sıx qrafikdə oynamağım, həm də yaş artıq öz sözünü deyir. Bu, məni çox yüklədi və zədələndim. Karyeram boyunca belə ağır zədəm olmamışdı. Türkiyənin İstanbul şəhərində müalicə olundum. Düzdür, 2 ayımı itirdim, ancaq əsas odur ki, bu gün yenə komandamın yanındayam".

Pressing.az