"Hələ heç nə bitməyib" - Valdas Dambrauskas

UEFA Çempionlar Liqasının 1-ci təsnifat mərhələsi çərçivəsində keçirilən "Sabah" - TNS matçından (1:0) "bayquşlar"ın baş məşqçisi Valdas Dambrauskas mətbuat konfransına qatılıb.

Pressing.az xəbər verir ki, litvalı mütəxəssis oyunla bağlı bunları deyib:

"Ümid edirəm ki, sizləri (jurnalistləri) Premyer Liqada keçiriləcək "Qəbələ" və "Kəpəz"lə matçlarda da görəcəm. Komandamızı Çempionlar Liqasına qələbə ilə başlaması münasibətilə təbrik edirəm. Çox çətin rəqibə qarşı oynadıq. Dərin müdafiə olunan bir kollektivlə üz-üzə gəldik. İlk dəqiqədən sonadək meydanda dominant tərəf biz idik və sonda istədiyimiz qolları vurduq. Futbolçularımdan məmnunam, çox yaxşı qalibiyyət əldə etdik. Əfsuslar olsun ki, son dəqiqələrdə Stiv Solvet qırmızı vərəqə aldı. Cavab qarşılaşmasında onu əvəzləməyə çalışacağıq.

Hələ heç nə bitməyib. Səfərdə də bizim üçün çətin olacaq. Üstəgəl, süni meydança amili də var. Əlimizdən gələni edəcəyik".