“Kəpəz” klubunun baş məşqçisi Azər Bağırov Misli Premyer Liqasının 29-cu turunda bu gün səfərdə “Sabah”a qalib gəldikləri oyunu (1:0) şərh edib.

Pressing.az xəbər verir ki, o, matçdan sonra təşkil olunan mətbuat konfransında əvvəlcə Aprel şəhidlərinin xatirəsini anıb:

“Aprel ayının ilk günlərini yaşadığımız üçün bütün şəhidlərimizə Allahdan rəhmət diləyir, qazilərə cansağlığı arzulayıram. Bu gün həm də vaxtilə komandamızın kapitanı olmuş Şəhriyar Rəhimovun doğum günüdür. Onu da yad edirik. Yəqin ki, ruhu şaddır. Azarkeşlərimizə dəstəyə görə minnətdarıq. Bizi lazımi səviyyədə dəstəklədilər. Maraqlı oyun alındı.

Qolumuzu vurub müdafiəyə çəkildik, əks-hücumda oynamağa çalışdıq. İstədiyimiz nəticəni qazandıq. Belə rəqiblərlə oyunda komanda xal itirməkdən qorxmur, rahat oynayır. Ona görə də bu cür matçlarda oyunumuz və nəticə daha yaxşı alınır".