"Rəqibin gücünə bələdik. Oyundan əvvəl də məşqçilər lazımi tapşırıqları verib. Albaniya millisini analiz etmişik. Rəqibin kimliyindən asılı olmayaraq, qələbə qazanmaq, xalqımızı sevindirmək üçün əlimizdən gələni edəcəyik.

Pressing.az xəbər verir ki, bu sözləri Azərbaycan millisinin futbolçusu Mahir Emreli sabah keçiriləcək Albaniya ilə oyundan əvvəl təşkil olunan mətbuat konfransında deyib.

"Oyunun rəsmi və ya yoldaşlıq matçı olmasının heç bir mənası yoxdur. Meydana Azərbaycan bayrağı altında çıxırıq. Albaniya xoş rəqibdir. Onların Avropa çempionatına hazırlaşması bizə əlavə motivasiya verir. Belə matçlar mənim üçün bayram kimidir. Milli komanda ilə qazanılan uğurun əvəzini heç nə vermir. Həmçinin hansı formada olduğumuzu görmək baxımından da əhəmiyyətli görüş olacaq. Komanda olaraq məşqlərdə bütün gücümüzlə hazırlaşırıq”.

Emreli meydana yüksək motivasiya ilə çıxacağını vurğulayıb: "Mövsüm sona çatsa da, oyun üçün acam. Çünki uzun müddət zədə səbəbindən oynamamışam. Motivasiyam başdan aşır. Bu sual Arif müəllimə verilsə daha yaxşı olardı. Amma məşqçimiz uşaqların hamısından razı görünürdü.

Hər birimizin Arif müəllimə hörmətimiz hədsizdir. Əlbəttə ki, onun bizə verdiyi motivasiya fərqlidi. Çünki o da bizim birimizdi - azərbaycanlıdır. Qol vursam, Arif müəllimə həsr edəcəm. Ümumiyyətlə isə hücumçunun işi qol vurmaqdır. Hər bir qol hücumçu üçün motivasiyadır".