"Zəfər turu": “Araz-Naxçıvan” “Karvan-Yevlax”a, “Zirə” “Turan Tovuz”a qarşı

Misli Premyer Liqasında “Zəfər turu” davam edir.

Pressing.az xəbər verir ki, bu tur Vətən Müharibəsindəki qələbəmizin 5-ci ildönümünə görə "Zəfər turu" adlandırılıb. Bütün oyunlar isə rəmzi olaraq hər saatın 44-cü dəqiqəsində başlanılır.

Bu gün 11-ci turun daha iki matçı keçiriləcək.

Əvvəlcə “Araz-Naxçıvan” “Karvan-Yevlax”ı sınağa çəkəcək. Naxçıvan klubu rəqibini Sumqayıtda qəbul edəcək. Hazırda “Araz-Naxçıvan” 16 xalla 6-cı pillədə qərarlaşıb. Elmar Baxşıyevin komandası son 3 turda qələbə qazana bilməyib. 5 xala malik “Karvan-Yevlax” isə turnir cədvəlində 11-cidir. Yevlax klubu son 4 turda xal üzünə həsrətdir.

Günün digər matçında isə “Zirə” “Turan Tovuz”u qəbul edəcək. Hazırda paytaxt təmsilçisi 19 xalla 4-cü pillədə qərarlaşıb. Tovuz klubu isə 21 xalla çempionatın lideridir. Lakin Rəşad Sadıqovun komandası bu matçda qalib gəlsə, “Zirə” ən azı bir günlük zirvəyə yüksələcək.

8 noyabr (şənbə)

15:44. “Araz-Naxçıvan” - “Karvan-Yevlax”
Hakimlər: Nicat İsmayıllı, Vüsal Məmmədov, Kərim Zeynalov, Kamran Əliyev
VAR: Əli Əliyev
AVAR: Şirmamed Mamedov
M.Hüseynzadə adına Sumqayıt şəhər stadionu

18:44. “Zirə” - “Turan Tovuz”
Hakimlər: Əliyar Ağayev, Zeynal Zeynalov, Akif Əmirəli, Emin Əliyev
VAR: İnqilab Məmmədov
AVAR: Zöhrab Abbasov
Zirə İK stadionu