Bu gün futbol üzrə Azərbaycan Premyer Liqasında 11-ci tura start veriləcək. Turun açılış matçı Şamaxı şəhər stationunda baş tutacaq, "Şamaxı" "İmişli"ni qəbul edəcək. Çempionatın lideri "Turan Tovuz" isə sabah "Zirə"nin qonağı olacaq. Oyun əfərəsində Tovuz təmsilçisinin vitse-kapitanı, millimizin üzvü Faiq Hacıyevlə əlaqə saxlayıb düşərgədəki vəziyyət, "Turan Tovuz"un gözlənilməz liderliyi və digər mətləblərdən danışdıq:

- Müəyyən fasilədən sonra komanda Tovuza qayıtdı. Yəqin ki, Tovuzdan, azarkeşlərdən ötrü darıxmışdınız.

- Məlumdur ki, ot örtüyünün dəyişdirilməsi ilə əlaqədar ev oyunlarını Bakıda keçirirdik. İstər "Azərsun Arena"da, istərsə də səfər oyunlarında azarkeşlərimiz həmişə komandanın yanında olublar, dəstəkləyiblər. Əlbəttə, Tovuzdan, oyunlarımıza gələ bilməyən azarkeş ordusu üçün darıxmışdıq. Həm həyəcanlı, həm də sevincli idik. Tovuzlu azrkeşlər Azərbaycanda ən yaxşılardandır və şadam ki, uzun fasilədən sonra onları qələbə ilə sevindirə bildik.

- 10-cu turdan sonra "Turan Tovuz" 21 xalla liderdir. Çempionat başlamamış belə bir mənzərənin olacağına inanırdın?

- Ötən mövsüm çempionatı 4-cü yerdə bitirdik. Bürünc medalları da qazana bilərdik. Ötənilki səhvlərimizdən nəticə çıxarmağı bacardıq. Komandamız yaxşı nəticələr əldə edir. Bunun davamlı olmasına çalışacağıq. O ki qaldı inam məsələsinə, 21 xal toplayacağımıza inanırdıq. Görünür, bu qədər xal hazırda lider olmağımıza yetərlidir. Fikrimcə, 3 məğlub olduğumuz oyunda səhvlər etməsəydik, xal ehtiyatımız daha çox ola bilərdi.


- Səncə, "Turan Tovuz"un çempionatın sonuna kimi liderliyi qoruyub saxlamağa gücü çatacaq?

- Buna çalışırıq. Zaman göstərəcək. Amma çox çətin olacaq. Birincisi, "Qarabağ" kimi rəqib var. Digər komandalar da zəif deyillər. Yəni çempion olmaq bir yana, medalçılar sırasına düşmək belə çox çətindir.

Söz düşmüşkən, "Qarabağ"ın Çempionlar Liqasındakı çıxışını yaxından izləyirəm. "Çelsi" ilə oyuna da baxdım. "Qarabağ"la qürur duydum. İnanıram ki, Qurban Qurbanovun komandası daha böyük uğurlara imza atacaq.

- Azarkeşlərin bir qismi "Turan Tovuz"u baxımlı futbol sərgiləməməkdə, sırf nəticəyə hesablanmış oyunda ittiham edir.

- Deməzdim. Bəlkə mən də azarkeş kimi komandanın oyununu tribunadan izləsəm, bu fikirdə olardım. Amma komandanın içindəyəm və bu üzdən nəyin baş verdiyini daha yaxşı bilirəm. Doğrudur, elə oyunlar olub ki, istdiyimizi edə bilməmişik, sırf nəticəyə oynamaq məcburiyyətində qalmışıq. Amma oyundan oyuna çıxışımızı yaxşılaşdırdığımızı düşünürəm. Azarkeşlər darıxmasınlar, getdikcə daha baxımlı oyun sərgiləyən "Turan Tovuz" görəcəklər.

- Çempionat başlayandan komandanı kapitan kimi meydana sən çıxarmısan. Kollektivdə birincisi olmaq çətin deyil ki?

- Kapitan olmaq böyük məsuliyyətdir. Sevinirəm ki, bu işi mənə tapşırıblar. Mən də üzərimə düşən işin öhdəsindən gəlməyə çalışıram. Fikrimcə, alınır. Amma bir məqamı da qeyd edim, birinci kapitan Şəhriyar Əliyevdir. Bir müddət zədəli oldu, indi formadadır. Amma oynamaq şansı qazanmır. İnanıram ki, Şəhriyar qarşıdakı oyunlarda heyətdəki yerini qaytaracaq və sarğını qoluna taxacaq.


- Amma 2 oyundur ki, sarğı Emmanuel Hakmana keçib. Başqa sözlə, əsas heyətdəki yerini itirmisən. Səbəb nədir?

- Baş məşqçimiz Kurban Berdıyev təcrübəli mütəxəssisdir. Yəqin ki, bu, rəqiblərə uyğun taktiki gedişdir. Yəni ehtiyatda qalmağımda özümlə bağlı nəsə bir problem görmürəm. Əksinə, bu, məni məşqlərdə daha ciddi olmağa məcbur edir. Ehtiyatda qalmaq heç bir futbolçuya xoş gəlmir. O cümlədən, mənə də. Belə vəziyyət uzun müddət davam edəndə futbolçunun inkişafını əngəlləyir.

- Bir kapitan kimi komandanı gücləndirmək üçün heyət baxımından hansı dəyişiklikləri edərdin?

- Bu, mənim işim deyil. Kurban Berdıyev hansı dəyişikliklərin edilməli olduğunu daha yaxşı bilir. Amma komandanın bir üzvü kimi bütün mövqelərin gücləndirilməsini istərdim. Çünki bir mövqeyə 2-3 futbolçunun namizəd olması komandada rəqabəti artırır. Rəqabət isə inkişaf və nəticə üçün vacib amillərdən biridir.

- Faiq, ötən ay ilk dəfə millinin düşərgəsinə dəvət aldın...

- Öncə başda millinin baş məşqçisi Ayxan Abbasov olmaqla məşqçilər korpusuna minnətdarlığımı bildirirəm ki, mənə inandılar, düşərgəyə dəvət etdilər. Doğrudur, Fransa və Ukrayna ilə oyunlarda adım iştirak ərizəsinə salınsa da, oynamaq qismətim olmadı. Çox istəyirdim ki, 1 dəqiqə olsa belə, meydana çıxım. Amma bu, mənim üçün böyük bir təcrübə oldu, oradakı atmosferi "daddım". Yenidən milliyə çağırılmaq üçün səylə çalışıram. İnanıram ki, gələcəkdə millinin heyətində oynamaq şansı qazanacam, komandamıza xeyir verəcəm, tovuzlu azarkeşlərə sevinc bəxş edəcəm.


- Bir qədər keçmişə qayıdaq. "Turan Tovuz"a 2021-ci ilin payızında gəlmisən. Deyəsən, həmin dövrdə futbolu atmaq təhlükəsi ilə üz-üzə qalmışdın...

- Peşəkar karyerama "Qəbələ"də başlamışam. 2 mövsümdə cəmi 8 oyunda meydana çıxmışdım. Bu da bir futbolçu üçün yetərli deyil. 2021-ci ilin yayında "Qəbələ"dən ayrıldım, klubsuz idim. Həmin vaxt hazırda "Neftçi"nin akademiyasında olan Asif Ramazanov məni "Turan Tovuz"un baş məşqçisi Rövşən Babayevə məsləhət görmüşdü. Rövşən müəllim mənimlə əlaqə saxladı və komandasına dəvət etdi. "Turan Tovuz" həmin vaxt 1-ci Divizionda çıxış edirdi. Bir mövsüm əsas heyətdə oynadıqdan sonra komanda Premyer Liqaya vəsiqə qazandı. Bir müddət əvəzedici komandada oynadım və zamanla baş məşqçimiz Ayxan Abbasovun etimadını qazana bildim. O vaxtdan əsas komandadayam. Yəni 4 il əvvəl Rövşən Babayev, onun zəngi olmasaydı, bəlkə də futbolu atmışdım.


- Sabah səfərdə "Zirə" ilə oynayacaqsınız. Çətin rəqibdir. Səncə, liderliyi qoruya biləcəksiniz?

- Ümumiyyətlə, bütün oyunlara 3 xal üçün çıxırıq. Təbii ki, çempionatda həmişə qalib gəlmək mümkün deyil. Amma sabahkı oyun hər iki komanda üçün böyük əhəmiyyət daşıyır. Ümid edirəm ki, sevinən tərəf biz olacağıq.

Məhəmməd Tağıyev, 525-ci qəzet