"Qarabağ" klubu Azərbaycan Premyer Liqasının 32-ci turunda səfərdə "Neftçi"ni 4:2 hesabı ilə məğlub edib.

Pressing.az xəbər verir ki, matçdan sonra keçirilən mətbuat konfransında Ağdam təmsilçisinin baş məşqçisi Qurban Qurbanov jurnalistlərin suallarını cavablandırıb:

- Hər iki komandanın azarkeşlərinə təşəkkür edirəm. Onların səsi, sayı futbolçularımıza çox kömək oldu. Oyun da əsl azarkeşlər üçün oldu. Qalib gəlməyi çox istəyirdik. Sonda qələbə bizimlə oldu. Amma nəticəni nəzərə almasaq, oyunu analiz etsək, 90 dəqiqə temp aşağı düşmədi, dinamik oyun keçdi. Xeyli sayda hücumlar və qol epizodlarımız oldu. "Neftçi" məğlub olmaq istəmirdi, sona qədər mübarizə aparırdı. Hər iki komandanın futbolçularına təşəkkür edirəm ki, bu cür oyun göstərdilər. Azarkeşlər üçün baxımlı matç alındı. Qarşıdakı oyunlara hazırlaşacağıq.

- Penalti epizodunda xeyli aqressiv görünürdüz. Baxdınız epizoda?

- Çox aqressiv deyildim. Soruşurdum, deyirdilər, təzə qanunlar var. Hər xırda epizoda penalti və cərimə zərbəsi versələr... Bundan əvvəl də bəzən hakimlərə fikirlərimi bildirmişəm. Onların əllərində o qədər qanunlar var ki, nə desək, doğrunu açıb göstərəcəklər. Bəsit epizodlarda o qədər sarı vərəqələrimiz olub ki. Bu cür oyunlarda aqressiya, istək daha çoxdur. Deyirlər yeni qanunlar var. Ona görə fikir bildirə bilmirik. Narazılığımı bildirdim. Epizoda da baxmışdım.

- Oyun bazar günü keçirilməli idi, amma bu günə salındı. Bu haqda fikriniz necədir?

- Oyun bizdən asılı olmayan səbəblərə görə təxirə salınmışdı, "Formula-1" Qran-prisi var idi. Bəzən belə hallar olur. Biz də avrokuboklarda oynayanda, bəzən oyunumuzu təxirə salmaq istəmişik. Hər halda, etirazımız yoxdur.

- "Qəbələ" ilə oyununuzun da vaxtı sürüşdürüldü...

- Hər iki tərəf istədi. Bizim uzun vaxtımız var idi. İdman formamızdan uzaqlaşa bilərdik. "Neftçi" ilə oyunda da güc sərf etdik. "Qəbələ" və bizim üçün faydası oldu. PFL tərəfdən də etiraz bildirilmədi.