"Səbail" klubunun baş məşqçisi Elvin Məmmədov Misli Premyer Liqasının 35-ci turunda "Neftçi"yə 0:3 hesabı ilə uduzduqları oyunu şərh edib.

Pressing.az xəbər verir ki, o, matçdan sonra keçirilən mətbuat konfransında deyib:

"Bilirdik ki, "Neftçi"nin də 5-ci yerə şansı var və bizə qarşı aqressiv oynayacaqlar. İlk dəqiqədə buraxdığımız qoldan sonra oyunumuz sındı. Bir matçımız qalıb. İnşallah, bundan sonrakı işlərə baxmalıyıq".

Mütəxəssis bildirib ki, növbəti mövsüm haqda danışmaq hələ tezdir: "Bu barədə rəhbərliklə hələ tam dəqiq söhbət etməmişik. Ümid edirəm ki, yenidən "Səbail" iddialı olub, birinci liqadan Premyer Liqaya yüksəlmək üçün hər şeyi edəcək. İndi danışmaq tezdir. Çünki danışıq olmayıb. Rəhbərliklə fikirlərimiz üst-üstə düşür ki, Premyer Liqaya geri qayıdaq. Amma maliyyə məsələsi də var. Çempionat bitdikdən sonra bu barədə ətraflı danışacağıq. Əgər xeyirdirsə, o yolda davam edəcəyik".