Fərid Qayıbov Avropa Gimnastikasının 30-cu Konqresində təltif edilib

Dekabrın 1-2-də Bolqarıstanın paytaxtı Sofiya şəhərində Avropa Gimnastikasının 30-cu yubiley konqresi keçirilib.

Pressing.az Azərbaycan Respublikasının gənclər və idman naziri Fərid Qayıbov təşkilatın prezidenti olaraq konqresə sədrlik edib.

Konqresdə bir sıra hesabatlar, eləcə də təşkilatın yenilənmiş Əsasnaməsi təsdiq edilib, yeni fəxri üzvlər qəbul olunub. Bundan başqa, təşkilatın 2025-ci il Konqresinin 28-29 noyabr tarixlərində Praqa (Çexiya) şəhərində keçirilməsi qərara alınıb.

Tədbirdə Fərid Qayıbov Bolqarıstanın gənclər və idman naziri Dimitar Lievə və Sofiya şəhərinin meri Vasil Terziyevə Avropa Gimnastikasının fəxri medallarını təqdim edib. Həmçinin Fərid Qayıbov Litva Olimpiya Komitəsinin xüsusi medalı və Avropa Atletikası ilə əməkdaşlığa görə həmin təşkilatın xüsusi mükafatı ilə təltif edilib.