Bu axşam "Qarabağ" və "Qalatasaray" klubları arasında xeyriyyə matçı keçiriləcək.

Artıq qarşılaşma üçün satışa çıxarılan biletlərin demək olar ki, hamısı satılıb. Ağdam klubunun verdiyi son məlumatda 60 min biletin alındığı bildirilib.

Fəqət sosial şəbəkələrdə yenə də "qara bazar" fırıldaqçılığı, müəyyən sayda biletlərin bəzi işbazların əlində olduğu barədə məlumatlar dərc olunur.

Bəs görəsən, Daxili İşlər Nazirliyi bu kimi hallara qarşı öncədən tədbir görürmü/görəcəkmi?

Qurumun Mətbuat Xidmətinin bölmə rəisi Zeyni Hüseynov Pressing.az-ın sorğusuna cavab olaraq bildirib ki, belə hallara rast gəlinəcəyi təqdirdə, polis qəti tədbir görəcək:

"Bizdə olan məlumata görə, oyun üçün satışa çıxarılan biletlər satılıb qurtarıb. Əgər stadionun ətrafında belə fakt müşahidə olunacaqsa, polis qəti tədbir görəcək, buna göz yummayacaq. Azərbaycan polisi hər zaman olduğu kimi, bu dəfə də öz üzərinə düşən vəzifəni yerinə yetirəcək".

Xatırladaq ki, Bakı Olimpiya Stadionunda (BOS) keçiriləcək oyun saat 20:00-da start götürəcək.

Pressing.az