"Debüt etməyim üçün qismət bu günə imiş" - "Turan Tovuz"un qapıçısı

Azərbaycan Premyer Liqasının 31-ci turunda "Sabah"la qarşılaşan "Turan Tovuz" ciddi itki ilə üzləşib.

Qərb təmsilçisinin qapıçısı Tərlan Əhmədli görüşün (0:2) 48-ci dəqiqəsində zədələnib.

Oyunu davam etdirə bilməyən qolkiperi Mehman Hacıyev əvəzləyib. Bu, Hacıyevin "Turan Tovuz"da bu mövsüm ilk rəsmi oyunu olub.

28 yaşında Premyer Liqada kapitan kimi debüt edən Hacıyev Pressing.az-ın suallarını cavablandırıb.

- 28 yaşında Premyer Liqada kapitan kimi debüt etdin. Bununla bağlı təəssüratlarını bölüşərdin.

- Bəli, 28 yaşımda Premyer Liqada ilk oyunuma çıxdım. Mənim üçün çox sevindirici haldır ki, debütümü doğma rayonumuzda - Tovuzda etdim. Təbii ki, istəməzdim ki, komanda yoldaşımın zədələnməsindən sonra meydana çıxım. İnşallah, Tərlanın zədəsi ciddi olmaz.

- Hələ 16 yaşında ikən adın iştirak ərazisində olub. "Turan Tovuz"un (əvvəlki adı ilə "Turan" - red.) çox çətin illərini görmüsən. Çox olmadı bu anı gözləmək?

- Bəli, yadımdadır. 16 yaşımda "Bakı" klubuna qarşı oyunda adım iştirak ərizəsinə daxil edilib. Əlbəttə, bir az gec ola bilər, amma qismət bu günə imiş. Xeyirlisi nədirsə, o da olsun.

Elsevər Muradzadə