Bu gün AFFA İntizam Komitəsinin iclası baş tutub.

Pressing.az xəbər verir ki, ilin sonuncu iclasında Azərbaycan kubokunun 1/8 finalında və Misli Premyer Liqasının 18-ci turundakı qayda pozuntuları ilə bağlı qərarlar qəbul olunub.

Azərbaycan kubokunda 1/8 finalın “Kəpəz” – “Sabah” oyununda meydan sahiblərinin 4 futbolçusu sarı vərəqə aldığına görə “Kəpəz” 700 manat cərimə edilib.

“Kəpəz” – “Sabah” oyununda meydan sahiblərinin azarkeşləri tərəfindən hakimlərin ünvanına kütləvi şəkildə təhqiramiz ifadələr səsləndirildiyinə və bu hal cari mövsümdə 2-ci dəfə yaşandığına görə “Kəpəz” klubu 500 manat cərimə edilib.

Azərbaycan Kubokunda 1/8 finalın “İrəvan” – “Araz-Naxçıvan” oyununa yanğınsöndürən avtomobil təyin edilmiş vaxtdan gec gəldiyinə görə meydan sahibləri 100 manat cərimə edilib.

Azərbaycan Kubokunda 1/8 finalın “Zirə” – “Turan Tovuz” oyununda “Zirə” klubunun 4 futbolçusu sarı vərəqə aldığına görə meydan sahibləri 700 manat cərimə edilib.

“Zirə” – “Turan Tovuz” oyununun 10-cu dəqiqəsində qonaq komandanın azarkeşləri tərəfindən pirotexniki vasitədən istifadə edildiyinə görə “Turan Tovuz” 1500 manat cərimə edilib.

Azərbaycan Kubokunda 1/8 finalın “Neftçi” – “Qaradağ Lökbatan” oyununda qonaq komandanın paltardəyişmə otağına dəymiş zərər “Qaradağ Lökbatan” tərəfindən ödəniləcək.

Misli Premyer Liqasının 18-ci turunun “Sumqayıt” – “Səbail” oyununda meydan sahiblərinin azarkeşləri tərəfindən meydançaya kənar əşya atıldığına görə “Sumqayıt” 800 manat cərimə edilib.

Misli Premyer Liqasının 18-ci turunun “Zirə” – “Qarabağ” oyununda qonaq komandanın 5 futbolçusu sarı vərəqə aldığına görə “Qarabağ” 700 manat cərimə edilib.