Vaqif Sadıqov: "Sabah"ın ikinci hissədə göstərdiyi oyun onu deməyə əsas verir ki..." – AÇIQLAMA

"Bizi nəticə məyus etdi, lakin oyuna baxanda gördük ki, "Sabah" böyük potensiala malikdir. Təmsilçimiz məğlub duruma düşsə də, özündə güc taparaq qol vurmağı bacardı. Sonda ikinci qolu da vurdular, lakin təəssüf ki, qeydə alınmadı".

Bu sözləri Pressing.az-a açıqlamasında futbol veteranı, AFFA-nın Məşqçilər Komitəsinin sədri Vaqif Sadıqov deyib. O, "Sabah"ın UEFA Çempionlar Liqasının 3-cü təsnifat mərhələsində ötən gün "Orxus"a qarşı keçirdiyi oyunu (2:1) şərh edib və cavab matçıyla bağlı düşüncələrini bölüşüb:

"Sabah"ın ikinci hissədə göstərdiyi oyun onu deməyə əsas verir ki, çempionumuz tarixində bir ilkə imza ataraq ÇL-in pley-off mərhələsinə vəsiqə qazana bilər. Təmsilçimizin bunun üçün bütün imkanları var. "Orxus" gənc futbolçulardan təşkil olunmuş dinamik, sürətli komandadır. Cavab oyununa çox ciddi hazırlaşmaq lazımdır. Rəqib dünən qapalı futbol oynayaraq daha çox əks-hücumlara bel bağlayırdı. Bakıda isə sırf nəticəni qorumağa çalışacaqlar. Bu da "Sabah" üçün olduqca vacib amildir. Komandamız gənc futbolçulardan təşkil olunmuş "Orxus"dan daha keyfiyyətli futbolçulara malikdir. Bunu da meydanda göstərmək lazımdır. Təmsilçimiz Masazırda böyük azarkeş dəstəyi önündə bütün imkanlarını səfərbər edərək bizləri sevindirməyə çalışacaq".

Daşqın Əziz