"Liverpul"dan yeni transfer - RƏSMİ

"Liverpul" klubu heyətini yeni futbolçu ilə gücləndirib.

Pressing.az xəbər verir ki, bu barədə klubun rəsmi saytı məlumat yayıb.

Premyer Liqa təmsilçisi Fransanın "Renn" klubundan Jeremi Jakeni transfer edib. 20 yaşlı mərkəz müdafiəçisi ilə 2031-ci ilin yayına qədər müqavilə imzalanıb.

Qeyd edək ki, Jeremi Jake "Renn"in yetirməsidir. O, əsas komandada 33 oyuna çıxıb, bunlardan 21-i 2025/2026 mövsümünə təsadüf edib. Müdafiəçi fevral ayında çiynindən aldığı zədə səbəbindən mövsümü vaxtından əvvəl başa vurmuşdu. O, həmçinin icarə əsasında "Klermon"un heyətində 24 matç keçirib.