"Azərreyl" hər zaman çempionluğa oynayır" – AÇIQLAMA

"Gənc komandaya qarşı oynadıq. Biz də rəqibə qarşı gənc heyətlə çıxış etdik. Yaxşı mübarizə oldu. Oyunçularımı təbrik edirəm. Yeni marafona başlamışıq. Ümid edirəm ki, zədəsiz irəliləyəcəyik. Rəqibə də uğurlar arzu edirəm. Qarşıdakı oyunlara hazırlaşacağıq".

Bu sözləri Pressing.az-a açıqlamasında "Azərreyl"in baş məşqçisi Cengiz Akarçeşmə ötən gün Azərbaycan çempionatında baş tutan "Azərreyl" - UNEC matçından (3:0) sonra deyib.

Türkiyəli mütəxəssis ikinci heyətlə oynamaları haqda bunları söyləyib:

"Daha çox gənc oyunçulara şans verdik. Voleybolçuların hər biri verdiyimiz tapşırıqları yerinə yetirdi. İlk setdə bir qədər çətinlik çəksələr də, tezliklə toparlanmağı bacardılar".

Akarçeşmə bumövsümkü hədəflərindən də söz açıb:

"Hədəfimiz dəyişmir - çempion olmaq. Ümumiyyətlə, "Azərreyl" hər zaman çempionluğa oynayır. Bu mövsüm də əlimizdən gələni edəcəyik ki, baş mükafata sahib çıxaq".

O, yeni transfer edib-etməyəcəkləri ilə bağlı da danışıb:

"Transfer pəncərəsi" açılana qədər keyfiyyətli oyunçular tapsaq, əlbəttə, onları heyətə qatmaq barədə düşünəcəyik".

Daşqın Əziz